पोखरा। स्याङ्जाको गल्याङमा सोमबार साँझ जीप दुर्घटना हुँदा दुई जनाको ज्यान गएको छ भने १७ जना घाइते भएका छन् ताजा सुचना
समय ११:27
सभादाता
मृत्यु हुनेमा गल्याङ नगरपालिका वडा नं ८ की २५ वर्षीया निशा पचभैया र गल्याङ-९ का ६० वर्षका यमबहादुर विक छन्।
दुर्घटनामा १७ जना घाइते भएकामा दुई जनाको अवस्था गम्भीर रहेको छ। जसमा वसन्ती विश्वकर्मा र देवी विक छन्। उनीहरूलाई थप उपचारका लागि पाल्पास्थित मिसन अस्पताल रिफर गरिएको छ।
अन्य १५ जना घाइतेको गल्याङ नगर अस्पतालमा उपचार भइरहेको जिल्ला प्रहरी कार्यालय स्याङ्जाका सूचना अधिकारी एवं प्रहरी नायव उपरीक्षक (डीएसपी) रमेशदत्त अवस्थीले जानकारी दिए।
नगर अस्पतालमा उपचार गराइरहेका घाइतेहरूमा जीप चालक दीपक विक, बोमा खनाल, सगुन विक, टोलबहादुर विक र असिसा पचभैया छन्।
यस्तै मेघनाथ खनाल, राधामाया राना, गंगा विश्वकर्मा, दुर्गा विक र यमकला खनालको पनि उपचार भइरहेको छ। घाइतेमध्ये स्नेहा परियार, सुप्रिया थापा, समिर विक, अरुणा गाहा र पार्वती विक भने उपचारपछि डिस्चार्ज भएका छन्।
गल्याङबाट वडा नं ९ साङलियातर्फ जाँदै गरेको ग१ज ६५३४ नम्बरको जीप करादीको उकालो घुम्तीमा नियन्त्रण गुमाएर सडकबाट खसेको डीएसपी अवस्थीले बताए।
दुर्घटना लगत्तै स्थानीय र प्रहरीले घाइतेको उद्धार गरेका थिए। घटनास्थलमा वडा प्रहरी कार्यालय वालिङबाट प्रहरी नायव उपरीक्षक प्रताप पौडेलको नेतृत्वमा १५ जनाको टोली खटिएको थियो।
साथै गल्याङ प्रहरी चौकीबाट पनि ट्राफिकसहित सात जनाको टोली पुगेको छ। प्रहरीले अस्पतालमा पुगेर घाइतेको पहिचान र विस्तृत विवरण संकलन गरिरहेको छ। दुर्घटनाको कारणबारे थप अनुसन्धान भइरहेको डीएसपी अवस्थीले बताए।
