जैमिनी नगरपालिका–१ मा प्रशासकीय भवन निर्माण किन ढिलो?
ताजा खुचना
समय १ ;34
सुजन अाचार्य
बागलुङ, जैमिनी । जैमिनी नगरपालिका–१ कुश्मीसेरामा निर्माणाधीन सुविधा सम्पन्न प्रशासकीय भवन समयमै सम्पन्न हुन नसक्दा स्थानीय नागरिकमा चासो बढेको छ। सम्झौताअनुसार निर्धारित समयमै सकिनुपर्ने भवन निर्माणमा ढिलाइ हुनुको मुख्य कारण निर्माण कार्यको सुस्त गति रहेको देखिएको छ।
नगरपालिकाका अनुसार भवन निर्माणको जिम्मा पाएको निर्माण कम्पनीको ढिलासुस्तीका कारण कामले अपेक्षित गति लिन सकेन। तीन वर्षभित्र सम्पन्न गर्ने लक्ष्यसहित सुरु भएको आयोजना निर्धारित समयभित्र नसकिएपछि थप समय दिइए पनि काम पूर्ण रूपमा सम्पन्न हुन सकेन। एक चरणमा म्याद थपिँदासमेत भवनको प्रगति करिब ७० प्रतिशत मात्र पुगेको थियो।
निर्माण व्यवसायी पक्षले भने निर्माण सामग्री ढुवानीमा समस्या र समयमा भुक्तानी नहुँदा काम प्रभावित भएको कारण देखाएको छ। यता नगरपालिकाले भने पटक–पटक काम छिटो सम्पन्न गर्न दबाब दिँदै आएको जनाएको छ।
निर्माण सम्पन्न हुन बाँकी पर्खाल, झ्यालढोका, विद्युत्, खानेपानी, रङरोगन, सजावट तथा अन्य पूर्वाधारका कामले पनि भवन पूरा हुन थप समय लाग्ने देखिएको छ।
कुश्मीसेरामा स्थानीयवासीले उपलब्ध गराएको जग्गामा निर्माण भइरहेको यो भवन सम्पन्न भएपछि नगरपालिकाका विभिन्न शाखा एउटै स्थानबाट सञ्चालन गर्न सहज हुने अपेक्षा गरिएको छ। हाल कार्यालय सञ्चालनका लागि भाडाका घर प्रयोग गर्नुपरेकाले नगरपालिकालाई आर्थिक भारसमेत परेको छ।
स्थानीयको माग छ— निर्माण कम्पनीले जिम्मेवारीपूर्वक कामलाई तीव्रता दिओस्, सम्बन्धित निकायले नियमित अनुगमन गरोस् र वर्षौंदेखि प्रतीक्षामा रहेको जैमिनीको आफ्नै प्रशासकीय भवन छिटोभन्दा छिटो सम्पन्न होस्।
